"قاسم احمد يكتب . اية هو التريند

#السوشيل_ميديا
ايه قوتها ؟
ايه هو التريند ؟
Power Of Social Media:
كتب / قاسم أحمد
في مسرحية شاهد مشفش حاجة عادل امام قال ايفيه شهير جدا " عارف نفق العباسية ..بعد ماتطلع منه هتلاقي بتاع عصير قصب ..وحش متشربش من عنده "

الغريب ان كان في فعلا بعد نفق العباسية واحد بتاع عصير قصب ..محل صغير ومحندق كدة والعصير بتاعه وحش فعلا وميتشربش ..ولما صاحب المحل اتفرج على المسرحيه اتضايق وراح رفع قضية على عادل امام وعلى المسرحية ..وخسرها في وقتها

الغريب ان مع الوقت المحل ده بقى اشهر محل عصير قصب في العباسية رغم انه صغير وعصيره وحش وميتشربش ..كل الناس بقت حابه تشرب قصب من المحل الي قال عليه عادل امام ..والمحل الصغير المحندق كبر

وصاحب المحل الي كان متضايق من الايفيه مكانش يعرف ان الايفيه ده هيفتح عليه باب رزق مكانش يحلم بيه
كان المغزي مع فارق التشبيه طبعا اهو الخدمة الي عملها عادل امام في صاحب المحل ده هي الي احنا بنعملها كل يوم على السوشيال ميديا مع ناس بتقدم محتوى سيئ جدا ..الي  يهري في حقوق المرأة ويعك في اي كلام ساذاج
 واللي يدخل سيرة الدين والاحاديث في اي هبل ..واحنا بكل سذاجة بننشر كلامهم وبنتريق عليهم  او بننتقدهم ..وبكدة نكون شهرناهم ونشرنا اساميهم واتعرفوا في كل حتة ..ويبقى بكل بساطة صدرنا للمجتمع شخصيات تافهه متخلفة بتقدم محتوى ميتقريش ويكبروا ويتعرفوا ويملوا السوشيال ميديا قرف

سيدنا عمر بن الخطاب كان بيقول اميتوا الباطل بالسكوت عنه
 ولا تثرثروا فينتبه الشامتون
بمعني متعملش شير لخبر سيء او محتوي فيك  بحجه النقد

ومش محتاج اقول ان في اجيال طالعة كل وعيها بيتشكل من السوشيال ميديا للاسف ..وكم من مصايب بتحدث بسبب اشاعات كاذبه علي السوشيال ميديا
ومش محتاج اتكلم عن حروب الجيل الرابع واستخدام السوشيال ميديا
مع تحيات ...
قاسم أحمد منسق عام مجلس الشباب المصري بالشرقية.