اسباب رحيل ميسى عن برشلونة

 ليه ميسي ساب برشلونة؟

الموضع باختصار هو اللوائح والقوانين، بتقول إيه اللوائح والقوانين؟ بتقول باختصار إن فيه سقف للميزانيات بتاعت كل نادي بيشارك في الدوري الأسباني "لا ليجا" مينفعش حد يتخطاه -حاجة كده شبه قانون اللعب المالي النظيف بتاع الاتحاد الأوروبي لكرة القدم- وبيشرف على تطبيق القانون ده رابطة الدوري الأسباني "ممكن نسميها اتحاد الكرة بتاعهم مع الفارق زي ما هنشوف" فالرابطة لقت إن برشلونة تجاوز السقف ده علشان كده حتى بالرغم من تقليل ميسي لراتبه بنسبة بنسبة 50% إلا إنهم برضه فضلوا معديين الحد الأقصى.

هنا بقى لا بيبو بتاع برشلونة ميل على أحميدو مجاهديانو بتاع لا ليجا وقاله برشلونة ده بيلعب باسم أسبانيا ولازم نقف جنبه، ولا مجاهديانو قال برشلونة عنده دوري أبطال لازم نساعده ونحافظ على ميسي ونفسيته فنرفع سقف الميزانية، ولا أشروفا صوبحياليس وزير الشباب الأسباني راح حل رابطة لا ليجا وعين لهم لجنة، ولا جمهور برشلونة هدد يولع في البلد علشان ممكن يخسروا الدوري بسبب رحيل ميسي، ولا شوخيرانوس مقدم البرامج اللي كان بيلعب في برشلونة راح لكفيل خليجي يشحت منه، ولا عاديليو كيعانيو طلع يقول برشلونة مخترق مخترق مخترق، ولا طيرْانو حفيظانو مدير الكورة في برشلونة طلع يتكلم عن ريال مدريد من غير مناسبة، ولا أي حاجة، الكل امتثل للقرار لأن القانون فوق الجميع مش برشلونة اللي فوق الجميع، وكان رد رئيس الرابطة حاسم وقال له لو عملت استثناء لبرشلونة يبقى كده المشروع الاقتصادي كله للدوري الأسباني هينهار.

بالمناسبة بعد رحيل رونالدو عن الريال بقى ميسي هو أكتر حد عامل قيمة كبيرة للدوري الأسباني، يعني القرار ده ممكن يخسر كمان الرابطة كتير مش برشلونة بس، لكن القانون واللوايح والمصلحة العامة والحفاظ على التنافسية والحيادية فوق كل شيء.

اضف تعليقك من خلال الفيس بوك

الصفحه الرئيسيه من هنا